Kurdistan Democratic Party
KDP-IRAN
Kurdistanukurd
ماڵپەڕی ناوەندیی حیزبی دێموکراتی کوردستان
چوارشه‌ممه ۲۹ ی جۆزه‌ردانی ۱۳۹۸ | 19/06/2019 | کاتژمێر:
ئەدەب

نیشتمان

06/06/2019 | 15:39:54
+A
-A
جەلال مەلکشا

کە خۆم ناسی!
وتم دایە: ئەمن کێم و چیم؟
خەڵکی کام شار،
کام وڵاتی سەر زەویم؟!

وتی: ڕۆڵە!
تۆ کوردی و دیل و هەژاری
نیشتمانت کوردستانە!
بەڵام ناوی نیشتمانت
لەسەر نەخشەی جوغرافیای جیهان نییە، بێ نیشانە!

وتم: دایە! باوکم کوانێ؟
بۆچی هەرگیز دەستی حەزی نەگووشیوم؟
بە کام تاوان من هەتیوم؟

وتی: ڕۆڵە!
ڕۆژێ کاتێ داگیرکەران شاریان سووتاند!
تفەنگی مافی کردە شان
ڕووی کردە ئاسۆی سەربەستی
لێزمەی خوێنی گەشی لەشی
بەسەر لێوی خاکا پژاند!
وتم: دایە! ئەی براکەم؟
شەپۆلی خەم، ئاوی ماتەم
گۆمی چاوی پڕ کرد لە ئەستێرەی فرمێسک

وتی: ڕۆڵە!
لە کازیوەی وەرزی ڕەشا
لاشەیان کردە نیشانە
سەری کاسی خەمەکانی بردە ژێر خاک
گیانی پاکی کردە فیدای،
سەربەستی ئەو کوردستانە!
وتم: دایە!
ئەی من چ بکەم؟
هەستا سەر پێ،
تفەنگێکی بڕنۆ کورتی بزمارڕێژی دایە دەستم

وتی: ڕۆڵە!
ئەی هەی هۆی ئاوات و مەبەستم!
دەیان ساڵە لە چوار لاوە
کوردستان دیل و یەخسیرە
دەست و پێ زنجیر کراوە
ڕێبازی خوێن بگرە و بڕۆ
دۆعای گەلی چەوساوەی کورد،
لە پشتی تۆ!
سنوورەکان بشێوێنە
کوردستانم بۆ بێنەوە
با بە دەوریا بسووڕمەوە
کوردستانم بۆ بێنەوە
با دانیشم لەتە لەتە وڵاتەکەم بدوورمەوە!