Kurdistan Democratic Party
KDP-IRAN
Kurdistanukurd
ماڵپەڕی ناوەندیی حیزبی دێموکراتی کوردستان
دووشه‌ممه ۱ ی ره‌زبه‌ری ۱۳۹۸ | 23/09/2019 | کاتژمێر:
ئێران

سی ساڵ بەسەر دەسەڵاتی ڕەشی عەلی خامنەییدا تێپەڕی

05/06/2019 | 20:38:23
+A
-A

سی ساڵ بەر لە ئێستا، دوای مردنی خومەینی عەلی خامنەیی بەشێوەی کاتی لە لایەن ڕەفسەنجانی و مەجلیسی خوبرەگان لە جێی خومەینی دانرا و بوو بە ڕێبەری کۆماری ئیسلامیی ئێران.
عەلی خامنەیی ئەو دیکتاتۆرەی کە سی ساڵ بەر لە ئێستا گەیشتە لووتکەی دەسەڵاتی ڕێژیمی کۆماری ئیسلامیی ئێران، لەگەڵ ئەوەی کە بەپێی ئەو کورتە ڤیدیۆیەی ساڵی ڕابردوو بڵاو کرایەوە، بۆ ماوەی کاتی بە ڕێبەر دیاریکرا، بەڵام دوای سی ساڵ تا ئێستاش هەر دەسەڵات بەدەستی یەکەمی ڕێژیمە و بۆتە یەکێک لە دیکتاتۆرە خوێنڕێژەکانی جیهان.
عەلی خامنەیی دوای سی ساڵ لە دەسەڵات تا ئێستاش نەک هەر نەیتوانی خزمەتێک بە ئێران و گەلانی ئێران بکا، بەڵکوو لە ژێر ڕێبەرایەتی شەڕخوازانەی ئەو ئاخوندە کۆنەپەرەستەدا ئێران و دۆخی ژیانی خەڵکی ئێران لەوپەڕی خراپی و نالەباری دایە.
لە ماوەی ئەو سی ساڵەدا خامنەیی هەر درێژەدەری ڕێگەی خومەینییە و ئەویش هەر لە سەر ڕاسپاردە و ڕێنوێنییەکانی ناوبراو، لەسەر قوتی خەڵک و بە سامانی خەڵکی ئێران هەر خەریکی هەناردە کردنی شۆڕشی ئیسلامییە و لەو ڕێگایەدا باجێکی زۆری داوە، بەڵام لەگەڵ هەر هەنگاوێکی ئاژاوەگێڕانەی، ئێرانی هەنگاوێک بەرەو دواوە گەڕاندۆتەوە و نەک هەر ڕێگر بووە لە پێشکەوتنی ئێران و خەڵکی ئێران، بەڵکوو بە سیاسەتی کۆنەپەرەستانەی خۆی ویستوویەتی خەڵک هەر لە دواکەوتووییدا ڕابگرێ.
سیاسەتی ئاژاوەگێڕانەی ڕێژیمی ئاخوندی بە ڕێبەرایەتی عەلی خامنەیی بۆتە هۆی ئەوەی کە پاسپۆرتی ئێرانی و خەڵکی ئێران لە هەموو شوێنێک بە چاوی گومانەوە سەیریان بکرێ، لە هەر شوێنیک کە تێرۆر ڕوو دەدا، ناوی کۆماری ئیسلامی لە لیستی یەکەمی گومانلێکراواندایە، لە نێو بیرورای گشتیی جیهانیی دەوڵەتەکەی نەک هەر بە تێرۆریست بەڵكوو بە ماکەی تێرۆر و پشتیوانی ئەسڵی تێرۆریزم ناسراوە. ڕێژیمەکەی عەلی خامنەیی بۆتە سەرچاوەی شەڕ و ئاژاوە لە وڵاتانی جیهان و بەشێوەیەک ڕیسوا بووە کە هیچ لایەنێک باوەڕ بە قسە و قەول و بەڵینەکانی کاربەدەستەکانی ناکا.
عەلی خامنەیی لەگەڵ ئەوەی کە لەنێو بیرو ڕای گشتی جیهانی وەک کەسێکی دیکتاتۆر و تێرۆریست سەیری دەکرێ، لە نێو بیروڕای گشتیی ئێرانیشدا کەسێکی بێزراوە و بۆتە جێی نەفرەتی گەلانی ئێران. خەڵکی ئێران لە ژێر ڕێبەریی ڕێژیمەکەی عەلی خامنەیی دا تووشی سەدان بەدبەختی و نەهامەتی بووە، هەژاری و برسیەتی هەموو وڵاتی گرتۆتەوە، بەندیخانەکان پڕن لە کەسانی ڕۆشنبیر و ئازادیخواز و گەمارۆ یەک لە دوای یەکەکان بۆ سەر ئێران ئاکامی سیاسەتی هەڵە و ئاژاوە گێڕانەی ئەو ڕێبەرە پیرە کۆنەپەرەستەن کە بەرۆک و داوێنی خەڵکی ئێرانی گرتۆتەوە.
دیاری خامنەیی بۆ گەلانی ئێران بێجگە لە سەرکوت، کوشتن و بەکوشتدانی ڕۆڵەکانی خەڵکی ئێران، سێدارە و ئێعدام، هەڵاواردن، داپڵۆسین و پێشێلکردنی مافە ئینسانییەکان هیچی تر نەبووە و تەنانەت ڕەحمی بە هاوبیرەکانی خۆسی نەکرد و بۆ پاراستنی دەسەڵاتەکەی ئەوانیشی خستە بەندیخانە یا لە دەسەڵات و سیاسەت پەراوێزی خستوون.
ئێستاش دوای سی ساڵ عەلی خامنەیی درێژە بە دەسەڵاتی سەرکوتکەرانەی خۆی دەدا و سپایەکی تێرۆریستی بۆ سەرکوتی گەلانی ئێران و ئاژاوە و تێرۆر لە جیهاندا پێکهێناوە و خۆی ڕیژیمەکەی بوونەتە یەکێک لە قێزەونترین ڕێبەر و ڕێژیمەکانی جیهان و تەنیا ڕێگای نەجات و ڕزگاریی خەڵکی ئێران نەمانی ئەو دیکتاتۆرە و ڕێژیمە خوێنڕێژەکەیەتی کە ماوەی چل ساڵە بەسەرکوت و کوشتن درێژە بە دەسەڵات دەدەن.