Kurdistan Democratic Party
KDP-IRAN
Kurdistanukurd
ماڵپەڕی ناوەندیی حیزبی دێموکراتی کوردستان
چوارشه‌ممه ۴ ی بانه‌مه‌ڕی ۱۳۹۸ | 24/04/2019 | کاتژمێر:
چالاکی

لە قەڵای دێموکرات، یادی دامەزرانی یەکیەتیی لاوانی دێموکراتی ڕۆژهەڵاتی کوردستان کرایەوە

09/04/2019 | 16:21:14
+A
-A

پێشنیوەڕۆی ڕۆژی سێ‌شەممە ٢٠ی خاکەلێوەی ٩٨ی هەتاویی بە بۆنەی ڕۆژی دامەزرانی یەکیەتیی لاوان ، بە ئامادەبوونی بەشێکی بەرچاو لە تێکۆشەران و کادر و پێشمەرگەو لاوانی نێو ڕیزەکانی حیزبی دێموکراتی کوردستان ، ڕێوڕەسمێکی تایبەت بەو یادە بەڕێوەچوو.
سەرەتای ڕێوڕەسمەکە پاش بڵاوبوونەوەی ماڕشی سروودی نەتەوایەتیی ئەی ڕەقیب بۆ ڕێزلێنان لە یادوناوی سەرجەم شەهیدانی کورد و کوردستان بەتایبەتی شەهیدانی لاو، خولەکێک بێدەنگی ڕاگەیاندرا.
دوای ئەوە لاوی بەهرەمەند سۆران فەریزی هەر لە دەسپێکی مەراسمەکە، بە ژەنینی دەف کەشێکی هونەری و جوانی بە ڕێوڕەسمەکە بەخشی.
پاشان هەردوو پێشکەشکار عەلی لەیلاخ و ژینا پاکدامەن وێڕای بەخێرهاتن کردن لە سەرجەم میوانان و ئامادەبووان، پێشەکییەکیان پێشکەش کرد.
دواتر پێشەوا عەلیپوور سکرتێری یەکیەتیی لاوانی دێموکراتی ڕۆژهەڵاتی کوردستان ، لە بەرەبەری دامەزرانی ئەو یەکیەتییە واتە ڕۆژی ٢٢ی خاکەلێوە پەیامێکی ئاراستەی ڕێوڕەسمەکە کرد.
پێشەوا عەلیپوور لە سەرەتای قسەکانی‌دا ئاوڕێکی کورتی لە خۆڕاگری لاوانی نێو ڕیزەکانی حیزبی دێموکرات دایەوەو، پاشان بە خستەڕووی لێهاتوویی و تواناییەکانی لاوانی بەهەست و هەڵوێستی کورد لە ڕۆژهەڵاتی کوردستان کە بە شێوازی جۆراجۆر بەرەنگاری پیلان و سیاسەتە دژەگەلییەکانی کۆماری ئیسلامی دەبنەوە درێژەی بە قسەکانی ‌دا.
ناوبراو بە ئاماژە پێدان بەنوێترین بڕیاری ئامریکا بەدژی ڕێکخراوی تیرۆریستیی کۆماری ئیسلامیی ئێران لەو پێوەندییە‌دا گوتی: چل ساڵە بزووتنەوەی کورد و پێشەنگی ئەو بزووتنەوەیە کە چینی چالاکی لاوانن، بوونەتە قوربانی دەستی ڕەشی تیرۆر و، ئەو ڕێکخراوەیە لە هەموو ڕێگایەک بۆ زەربە لێدان لە لاوانی کورد وەکوو سەرمایەی ئێستا و دواڕۆژی نەتەوەکەمان دەستی نەپاراستوە، لە کوشتن و بڕین و گرتن و ئێعدامی لاوان تا هەوڵدان بۆ بەتاڵکردنیان لە هەستی شوناسخوازنە.
پێشەوا عەلیپوور لە کۆتایی قسەکانی‌دا باسی لەوە کرد کە بە خۆشحاڵییەوە ئەمڕۆ دەبینن کە ئەو هەوڵانە سەری نەگرتووەو ئەوە لاوانی چالاک و پێشڕەو و لێهاتووی ڕۆژهەڵاتی کوردستانن، کە خاوەنداریەتیی لە کیانی سیاسی و کۆمەڵایەتی و فەرهەنگی گەلی کورد لە ڕۆژهەڵاتی کوردستاندا دەکەن.
هەروەها پێویستە بگوترێ کە سکرتێری گشتیی حیزبی دێموکراتی کوردستان بەڕێز کاک مستەفا مەولوودی پەیامێکی پێرۆزبایی پێشکەش بە یادی دامەزرانی یەکیەتیی لاوان کرد بوو.
لە درێژەی ئەو ڕێوڕەسمە‌دا پەیامی دەفتەری سیاسیی حیزب، لە لایەن بەڕێز سمایل شەڕەفی ئەندامی کومیتەی ناوەندی حیزبی دێموکراتی کوردستانەوە خوێندرایەوە.
لە بەشێک لە پەیامی دەفتەری سیاسیی حیزبی دێموکراتی کوردستاندا هاتبوو؛
حیزبی دێموکراتی کوردستان وێڕای دیتن و بەرزنرخاندنی چالاکی و تێکۆشانی یەکیەتیی لاوان و، دووپاتکردنەوە پشتیوانیی خۆی لەو ڕێکخراوەیە، بەردەوامیی و هەرچێ کاراتربوونی لە پێناو بەرزکردنەوەی ویست و داخوازییەکانی لاوان و دەرخستنی تواناکانی ئەو توێژە لە کۆمەڵگە بە ئاوات دەخوازێ.
لە درێژەی پەیامی دەفتەری سیاسیی حیزبی دێموکراتی کوردستان کە بە بۆنەی ٢٢ی خاکەلێوە ئامادەکرابوو، بە باسکردن لە دۆخی هەنووکەیی ڕۆژهەڵاتی کوردستان لە بواری سیاسی و مەدەنی و فەرهەنگییەوە، بە ئاماژەدان بە ڕەفتاری کۆماری ئیسلامی لەو پێوەندییە‌دا هاتبوو: لاوانی هوشیار و دەروەستی نیشتمان کە ئەمڕۆ لە هەموو بەستێنەکانی تێکۆشان و خەباتدا حزووری سەرەکی و بەرچاویان هەیە، بە مەبەستی تەقوییەتی ناسنامەی نەتەوەیی و نیشتمانی، بە دەرکێکی درووست لە بەرژوەندی گشتی و نەوەیی گەیشتوون، هەربۆیە لە پەیام و هاوارەکانیاندا بەبێ ئەوەی لێی ماندوو بن و، بە بێ ئەوەی لە ڕابردووی ناتەبایی و نالێکییەکاندا بژین، سەرسەختانە پێداگری لەسەر یەکگرتوویی و یەکبوون دەکەن.
لە کۆتایی پەیامی دەفتەری سیاسی بە باسکردن لە خەباتی فرەچەشن کە لە ڕۆژهەڵاتی کوردستان بەردەوامەو لاوان بەشداریی بەرچاویان هەیە، ڕۆڵی لاوانی لە سەنگەرە جیاجیاکان بە مەبەستی دەستبەرکردنی مافە نەتەوەیی و دێموکراتییەکانی گەلی کورد بەرز نرخێندرا بوو.
پاش پەیامی دەفتەری سیاسیی حیزبی دێموکراتی کوردستان ، ئاسۆ موئمینی تازەلاوی بەهرەمەند، چەند گۆرانییەکی کوردی پێشکەش بەو یادە کرد.
دواتر مووژگان عەلیپوور ئەندامی بەڕێوەبەری یەکیەتیی ژنانی دێموکراتی کوردستان پەیامی یەکیەتیی ژنانی پێشکەش کرد.
لە پەیامی یەکیەتیی ژنان باسێک لە هاوکاری و هاوئاهەنگی نێوان ئەو دوو یەکیەتییە کرابوو بە مەبەستی هەوڵدان بۆ وشیارکردنەوەی لاوان و ژنان و هەروەها بەهادان بەو دوو توێژە گرینگ و شوێندانەرە لە کوردستانی ئێران .

هەروەها مووژگان عەلیپوور باسی لە هاوکاری و پاڵپشتی یەکیەتیی لاوانی دێموکراتی ڕۆژهەڵاتی کوردستان کرد، کە دوای کارەساتی ١٧ی خەرمانان کە زەرە و زیانی مرۆیی و ماددی لە یەکیەتیی ژنان درا بوو، بەڵام لاوان، بۆ لەسەر پێ‌مانەوەی یەکیەتیی ژنان لە هیچ هاوکارییەک دەریغییان نەکردوە.
هەر لەو پێوەندییە‌دا پاش قسەکانی مووژگان عەلیپوور ، لەوحەی ئەمەگناسی و نەخشێنراو، بە وێنەی شەهیدان ، سوهەیلا قادری و پێشەواعەزیزپوور لە لایەن خاتوو شلێر مەحموودی سکرتێری یەکیەتیی ژنانی دێموکراتی کوردستان ، پێشکەش بە پێشەوا عەلیپوور کرا.
پاش خوێندنەوەی شێعرێک، کە لە شاری بۆکانەوە لە لایەن شاعێریکی دێموکراتدۆست نێردرابوو، هونەرمەند ئاوات بۆکانی مەقام و بەستەیەکی پێشکەش کرد.
لە بڕگەیەکی دیکەی ئەو ڕێوڕەسمەدا کۆمەلێک لە مامۆستایان کە لە کرانەوەی دەورەکانی یەکیەتیی لاوان بۆ ڕاهێنان و پێگەیاندنی تازەلاوان و لاوانی نێو ڕیزەکانی حیزب، ئەرکیان لە ئەستۆ گرتبوو ، لە لایەن دوو کەس لە بەڕێوەبەرانی یەکیەتیی لاوان، خاتوو شەنم هەمزەیی و ئارەزوو عەزیزی بە نوێنەرایەتی لە قوتابیان و بەشدابووان لەوحەی ڕێزلێنانیان پێشکەش کرا.
لە درێژەی ئەو رێوڕەسمە‌دا خەڵاتی زێڕینی کاک سدیق ئەنجیری ئازەر تێکۆشەری لێهاتوویی حیزبی دێموکرات کە یەکیەتیی لاوان ئامادەی کرد بوو ، بەخشرا بە کاک قاسم سوڵتانی ، کە چەندین ساڵە ئەمەگناسانە درێژەدەری ڕێگای ئامانجی شەهیدانەو بە پاراستنی ئاڕشیڤ و بەڵگەکانی حیزبی دێموکرات، خزمەتێکی بەرچاوی بە ڕاگەیاندنی حیزب کردوە.
ئەوخەڵاتە لە نێو چەپڵەڕیزانی ئامادەبووان بە دەستی کاک مستەفا مەولوودی سکرتێری گشتیی حیزبی دێموکراتی کوردستان پێشکێش بە کاک قاسم سوڵتانی کرا.
بڕگەیەکی دیکە ئەو ڕێوڕەسمە تەرخانکرابوو بۆ ڕێزلێنان لەو تازەلاوان و گەنجانەی کە چەند ساڵە ئەندامی یەکیەتیی لاوان بوون و، ئێستا لە ئۆرگانەکانی دیکەی حیزبی دێموکراتی کوردستان درێژە بە تێکۆشانی خۆیان دەدەن.
شایانی باسە یەکیەتیی لاوانی دێموکراتی کوردستان هونەرمەند ئاوات بۆکانی بە لاوی ساڵی ٩٧ی هەتاویی ناساند و خەڵاتی ساڵی پێشکەش بەو هونەرمەندە دێموکراتە کرد.

ئەو ڕێوڕەسمە بە هەڵپەڕکیی گشتی کۆتایی پێهات.