Kurdistan Democratic Party
KDP-IRAN
Kurdistanukurd
ماڵپەڕی ناوەندیی حیزبی دێموکراتی کوردستان
دووشه‌ممه ۲ ی گه‌لاوێژی ۱۳۹۶| 24/07/2017 |کاتژمێر:
ئەدەب

سێ پارچه شێعری کورت که‌ له‌ لایه‌ن مامۆستا ئاشقه‌وه‌ له‌ رێوڕه‌سمی “یه‌ڵدای خوێناوی” له‌ شاری ستۆکهۆڵم خوێندراونه‌وه‌

04/01/2017 | 12:33:59
ashiq2
ئاشق

سێ پارچه شێعری کورت که‌ له‌ لایه‌ن مامۆستا ئاشقه‌وه‌ له‌ رێوڕه‌سمی “یه‌ڵدای خوێناوی” له‌ شاری ستۆکهۆڵم خوێندراونه‌وه‌:‌
گوڵاڵەکان دەڕوێنەوە

ــــــــــــــــــــــــــــــــــــــــــــــــــــ
دۆخ هەرچەندە تەنگەبەر بێ
هەنگاو دەنێم، ناکشــــێمەوە
وەکوو گوڵ دوای پەڕپەڕبوونێ
هەموو ساڵێ دەڕوێمـــــــەوە
***
بڕوانن دەشتـــــــی ئەو زێدە
بە سوورەگوڵ داپۆشـــــراوە
بە چاوی خۆم سەد جارم دی
گوڵ پێخوست بوو و هەر رواوە
***
ئەو کاروانەی بەڕێــــــوەیە
ئاخری دەگاتە سەرمەنزڵ
مرادی رێبـــواری ماندوو
رۆژێکی هەر دەبێ حاسڵ

ئەستێرەکان
ــــــــــــــــــــــــــــــــ

ئەستێرەکان،
لە هەڕەتی زریوەدا،
یەکەیەکە،
لەبن هەوری ڕەشی چڵکن،
بزر دەبن، دەکوژێنەوە.
مۆم دەسووتێن،
دەوروبەریان رووناک دەکەن،
تنۆکتنۆک، دەتوێنەوە.

پەندێکی کۆنی کوردانە:
“دنیا تاسەر هەروا نابێ”
بای وادە، وادە ناشکێنێ،
هەورە رەشە دزێوەکان،
دیسان دەڕۆن،
دەبڕێنەوە.
پڕ بە ئاسمانێکی ساماڵ،
ئەستێرە دەزریوێنەوە.

هەر بینا هەزاران “ماملێ”،
لە هەر سووچێکی کوردستان،
تێیان هەڵ‌کرد:
“دەڵێن کوێستانچی دێنەوە”.

دەردی دڵێک
ـــــــــــــــــــــــــ
نەبینێ گوڵ بە پێخوستی، وەنەوشە سەر بەهەش نابێ
نەهاتی لێ‌گەڕێ، دەرد و پــــــەژارە باری لەش نابێ

کە نەڕژێنێتە دڵ، دەستــــــــــــی قەزا، ژاراوی ناکامی
گلێنەی چاو، پڕی فرمێسکی سوێر و خوێنی گەش نابێ

سیاسەت گەر بپاڵێورێ لە خۆخوازی و لە خۆخۆری
دەروو دەکریتەوە بۆ یەکدڵی و، ئەو خەڵکە بەش نابێ

ئاشق
٢٠١٦
لە ژماره‌ ٦٩٥ ی رۆژنامه‌ی “کوردستان”دا بڵاو بۆته‌وه‌